«Cuaderno de la Revolución»

Herederos de la Revolución / Fotograma de "Cantares de una revolución"

Y llegó'l 85 aniversariu de la revolución d'Asturies y como suel pasar nesti cachín del mundu pasó ensín pena nin gloria, como l'aire les castañes ximielgó, pero nun valtió un res.

Sicasí, hebo quien nun dexó pasar la efeméride y fizo alcordanza y reivindicación con esta fecha como ye'l casu de Ramón Lluis Bande. Cineasta, activista y axitador militante de la conciencia y la desmemoria asturiana, ufiértanos nesti volumen lo qu'él define como un guión extendíu de la so película "Cantares de una Revolución" y que s'estrenó na edición pasao del FICX con premiu especial del públicu y col cartel d'entraes escosaes en tolos sos pases.

Pero ye que "Cuaderno de la Revolución" nun ye solo un guión extendíu. Ye tamién un cancioneru que mos ufierta los cantares d'aquella revolución qu'en 1934 pretendía tomar el cielu por asaltu y qu'anguañu recupera Nacho Vegas. Pero tamién ye un homenaxe a les xeneraciones más dignes de la llucha polos derechos d'esti país. Y, sobre too, ye un antídotu contra'l facismu, el mesmu qu'entonces facía mitines en Cuadonga y qu'anguaño abre campañes electorales nel mesmu sitiu. Y, tamién, ye una amuesa del procesu creativu, de cómo se construye dende ceru una película que ye tantes coses a la vez.

De destacar ye ver en papel l'hestóricu documentu "Los presos asturianos, ¡Acusamos!" que se recupera nesta obra.

Nun momentu nel que s'empeñen en dicinos que nun hai alternatives, que la resignación ye l'únicu camín pa esti país, Ramón Lluis ufiertanos un manual d'instrucciones dende'l que, polo menos, intuir d'ú venimos pa pensar ú queremos dir.

Títulu: "Cuaderno de la Revolución"
Autor: Ramón Lluis Bande
Editorial: Pez de Plata
ISBN: 9788494917769
Preciu: 18,90€